សេចក្ដីប្រកាសព័ត៌មានស្ដីពី សិក្ខាសាលាស្តីពី “ប្រព័ន្ធអេកូឡូស៊ីថ្នាលផ្លាស់ប្តូរទិន្នន័យកម្ពុជា (CamDX)” សម្រាប់វិស័យកឯកជនដែលចង់ចូលជាសមាជិកថ្នាល Camdx អាចធ្វើការដាក់ពាក្យស្នើសុំជាសមាជិក
នៅថ្ងៃទី១ ខែតុលា ឆ្នាំ២០២៥ មជ្ឈមណ្ឌលធុរកិច្ចថ្មី”តេជោ” ដែលជាប្រតិបត្តិករនៃថ្នាលផ្លាស់ប្តូរទិន្នន័យកម្ពុជា (CamDX) បានចេញសេចក្តីប្រកាសព័ត៌មានស្តីពីការរៀបចំសិក្ខាសាលាលើកទី១របស់ខ្លួន ស្តីពី “ប្រព័ន្ធអេកូឡូស៊ីថ្នាលផ្លាស់ប្តូរទិន្នន័យកម្ពុជា (CamDX)” ដែលមានការអញ្ជើញចូលរួមពីតួអង្គពីវិស័យសាធារណៈ វិស័យឯកជន និងដៃគូអភិវឌ្ឍពាក់ព័ន្ធនានាប្រមាណ ១៥០នាក់។ សិក្ខាសាលាត្រូវបានរៀបចំឡើងក្នុងគោលបំណង ជំរុញការយល់ដឹង និងបង្កើនការចូលរួមប្រើប្រាស់ផលិតផលឌីជីថល ដែលស្ថិតក្នុងប្រព័ន្ធអេកូឡូស៊ីថ្នាល CamDX ដែលមានស្រាប់។
ជារួម សិក្ខាសាលានេះបានឆ្លុះបញ្ចាំងពីសារៈសំខាន់នៃការចូលរួមពីតួអង្គសំខាន់ៗទាំងវិស័យសាធារណៈ និងវិស័យឯកជនក្នុងការផ្លាស់ប្តូរ ឬចែករំលែកទិន្នន័យក្នុងប្រព័ន្ធអេកូឡូស៊ីថ្នាល CamDX ដែលរួមចំណែកក្នុងការជំរុញកំណើនសេដ្ឋកិច្ច ជាពិសេសសេដ្ឋកិច្ច API និងសង្គមឌីជីថលនៅប្រទេសកម្ពុជា។ ក្រសួង ស្ថាប័ន ដែលកំពុងគ្រប់គ្រងទិន្នន័យគោល ក៏ត្រូវបានលើកទឹកចិត្តក្នុងការចូលរួមចែករំលែកទិន្នន័យក្នុងប្រព័ន្ធអេកូឡូស៊ីថ្នាល CamDX ឱ្យបានកាន់តែច្រើន ដើម្បីធានាបាននូវប្រសិទ្ធភាពនៃការផ្តល់សេវាសាធារណៈរបស់រាជរដ្ឋាភិបាល និងសម្រួលដល់ប្រតិបត្តិការអាជីវកម្មនៃវិស័យឯកជន តាមទម្រង់ឌីជីថល ស្របតាមមុំទី៥ នៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។
មជ្ឈមណ្ឌលធុរកិច្ចថ្មី"តេជោ"
